மார்கழி 23-ஆம் நாள் - ஆண்டாள் திருப்பாவை பாசுரம் 23: மாரி மலைமுழஞ்சில் மன்னிக் கிடந்துறங்கும்

ஆண்டாளின் திருப்பாவைப் பாசுரங்களில், இதுவரை கண்ணனை குழந்தையாகவும் தெய்வமாகவும் போற்றி அழைத்த ஆண்டாள், இப்போது 23ஆம் பாசுரத்தில் அவனை ஒரு கம்பீரமான அரசனாகக் காட்டி வேண்டுகிறார். மழைக்காலத்தில் குகையில் உறங்கும் சிங்கத்தின் எழுச்சியைப் போல, கண்ணன் தன் இல்லத்தில் இருந்து வெளிப்பட்டு, அடியார்களின் கோரிக்கைகளை நியாயமாக விசாரித்து நிறைவேற்ற வேண்டுமெனக் கேட்கிறார். இறைவனிடம் வேண்டும் போதும் நியாயமும் முறையும் இருக்க வேண்டும் என்பதை ஆண்டாள் அழகாக உணர்த்துகிறார்.

திருப்பாவை பாசுரம் 23:

மாரி மலைமுழஞ்சில் மன்னிக் கிடந்துறங்கும்

சீரிய சிங்கம் அறிவுற்றுத் தீவிழித்து

வேரி மயிர்பொங்க எப்பாடும் பேர்ந்துதறி

மூரி நிமிர்ந்து முழங்கிப் புறப்பட்டுப்

போதருமா போலே நீ பூவைப்பூவண்ணா உன்

கோயில் நின்றிங்ஙனே போந்தருளிக் கோப்புடைய

சீரிய சிங்காசனத்திருந்து யாம் வந்த

காரியம் ஆராய்ந்து அருளேலோர் எம்பாவாய்.

பொருள்:

மழை பெய்யும் காலத்தில் மலையின் குகையில் ஆழ்ந்த உறக்கத்தில் இருக்கும் பெருமைமிக்க சிங்கம், திடீரென விழித்து, கண்களில் தீப்பொறி பறக்க, உடல் மயிர்கள் சிலிர்த்து நிற்க, கம்பீரமாக நிமிர்ந்து கர்ஜித்தபடி குகையை விட்டு வெளிப்படுகிறது. அதுபோலவே, பூவை நிறத்தவனான கண்ணா! நீயும் உன் திருமாளிகையில் இருந்து இவ்வாறு எழுந்து வெளியே வந்து, அழகிய வேலைப்பாடுகள் நிறைந்த சிங்காதனத்தில் அமர்ந்து, எங்களின் கோரிக்கைகளை நியாயமாக விசாரித்து, அது சரியானதாக இருந்தால் அருள் செய்வாயாக.

விளக்கம்:

கண்ணனை சிங்கத்தின் கம்பீரத்துடன் ஒப்பிட்டு, அவன் அரசனைப் போல் அடியார்களின் வேண்டுதல்களைக் கேட்டறிய வேண்டுமென ஆண்டாள் கோருகிறார். இதுவரை உரிமையுடன் "எழுந்து வா" என அழைத்தவள், இப்போது "நியாயமாக ஆராய்ந்து அருள் செய்" என மரியாதையுடன் கேட்பது, பக்தியில் கூட எல்லை தாண்டக் கூடாது என்பதை உணர்த்துகிறது. இறைவனிடம் "இது வேண்டும்" என வற்புறுத்தாமல், "எனக்கு உகந்ததை அருள்" என விட்டுவிடுவதே உண்மையான பக்தி. ஆண்டாளின் இந்த உயர்ந்த பக்தி நிலையே அவரை தனித்துவமாக்குகிறது. மார்கழி மாதத்தில் இப்பாசுரத்தைப் பாராயணம் செய்து வழிபட்டால், மனதில் நியாய உணர்வும் இறை அருளும் பெருகும். ஆண்டாளின் பாடல்கள் தான் மார்கழியில் கோயில்களில் சுப்ரபாதமாக ஒலிப்பவை என்பதும் இதன் சிறப்பு.