மார்கழி 21-ஆம் நாள் - ஆண்டாள் திருப்பாவை பாசுரம் 21: ஏற்ற கலங்கள் எதிர்பொங்கி

ஆண்டாளின் திருப்பாவைப் பாசுரங்களில், முந்தைய பாடல்களில் தோழியரை எழுப்பி, கண்ணனின் இல்லத்துக்கு வந்து, நந்தகோபர், யசோதை, பலராமன், நப்பின்னை ஆகியோரை அழைத்தும் கண்ணன் எழுந்திருக்கவில்லை. இப்போது 21ஆம் பாசுரத்தில், நேரடியாக கண்ணனிடம் முழு சரணாகதி அடைந்து, அவனது பெருமைகளைப் போற்றி எழுந்தருள வேண்டுகிறார் ஆண்டாள். இறைவனிடம் முழுமையாகச் சரணடைவதே அவன் அருளைப் பெறும் ஒரே வழி என்பதை அழகாக உணர்த்தும் இப்பாசுரம், பக்தியின் உச்சத்தை வெளிப்படுத்துகிறது.

திருப்பாவை பாசுரம் 21:

ஏற்ற கலங்கள் எதிர் பொங்கி மீதளிப்ப

மாற்றாதே பால் சுரியும் வள்ளல் பெரும்பசுக்கள்

ஆற்றப் படைத்தான் மகனே அறிவுறாய்

ஊற்றம் உடையாய் பெரியாய் உலகினில்

தோற்றமாய் நின்ற சுடரே துயிலெழாய்

மாற்றார் உனக்கு வலி தொலைந்து உன் வாசல் கண்

ஆற்றாது வந்து உன் அடி பணியுமா போலே

போற்றி யாம் வந்தோம் புகழ்ந்தேலோர் எம்பாவாய்.

பொருள்:

பாத்திரங்கள் நிரம்பி வழியும் அளவுக்கு, கொடையாளி போல் தாராளமாகப் பால் சொரியும் பெரிய பசுக்களை உடைய நந்தகோபரின் மகனே! கண்ணா, எழுந்திரு. உலகில் உன்னைவிட ஊற்றமானவர் யாருமில்லை; உன்னைவிடப் பெரியவர் யாருமில்லை. உலகம் தோன்றியதற்கே காரணமான ஒளியே! துயிலை விட்டு எழுந்தருள். உனக்கு எதிரிகள் உண்டானாலும், அவர்கள் வலிமையை இழந்து, உன் வாசலில் வந்து காத்திருந்து, உன் திருவடிகளை வணங்குவார்கள். அதுபோல், நாங்களும் உன்னையே போற்றி, புகழ்ந்து, உன் அருளைப் பெற வந்துள்ளோம். எங்களுக்கு உன் கருணையை அருள்வாயாக.

விளக்கம்:

கண்ணனின் தந்தையின் செல்வத்தையும், அவனது பெருமையையும், உலக ஒளியாகிய அவன் மகிமையையும் விவரித்து, எதிரிகள் கூட சரணடையும் அவன் திருவடியில் தாமும் சரணடைந்துள்ளதாகக் கூறுகிறார் ஆண்டாள். இது முழு சரணாகதியின் சக்தியை உணர்த்துகிறது. மார்கழியில் இப்பாசுரத்தைப் பாடினால், இறைவனின் முழு அருளும் சரணாகதி உணர்வும் கிடைக்கும்.